Яр Чаллы хәрәкәт, истәлек һәм бердәмлекнең аерым энергиясе белән тулды. Ф. Табеев исемендәге яр буенда Бөек Ватан сугышындагы Җиңүнең 81 еллыгына һәм җәйге спорт сезонын тантаналы ачуга багышланган 52-нче традицион шәһәр җиңел атлетика эстафетасы узды.
Ике меңнән артык катнашучы стартка чыкты: мәктәп укучылары, студентлар, предприятие һәм оешма вәкилләре. Эстафетаның һәр этабы рух ныклыгы, буыннар бәйләнеше һәм бөек батырлыкка хөрмәт символына әйләнде.
Җиңүчеләр һәм призерлар кубоклар, медальләр һәм грамоталар белән бүләкләнделәр, ә тантананың аерым мизгеле булып ГТО алтын билгеләрен тапшыру торды. Бүләкләрне республика ярышлары призерлары, шәһәр стартларында актив катнашучылар һәм гаилә командалары алды. Аларны тапшыру хөрмәте Олимпия чемпионы Гөлнара Галкина-Самитовага бирелде.
5-7 сыйныф укучылары арасында беренче этап җиңүчесе булып 39-нчы күппрофильле мәктәп укучысы Семен Егоров булды, беренче урынны 60-нчы мәктәп, икенчесен — 10-нчы мәктәп, өченчесен — 50-нче мәктәп алды.
8-11 сыйныф укучылары арасында беренче этапта иң яхшысы 14-нче мәктәп вәкиле Самир Бәкиров булды, беренче урында — 41-нче мәктәп, икенчедә — 10-нчы мәктәп, өченче урында — 32-нче мәктәп.
Һөнәри белем бирү учреждениеләре арасында беренче этап җиңүчесе — Сәнәгать-педагогия көллияте студенты Андрей Ошев, беренче урынны Сәнәгать-педагогия көллияте алды, икенче урында — КФУның Чаллы филиалы, өченче урын Л.Б. Васильев исемендәге Кама дәүләт автомобиль-механика техникумында.
Югары уку йортлары арасында беренче этапта Яр Чаллы дәүләт педагогия университеты студенты Андрей Федорук аерылып торды, беренче урында — КФУның Чаллы филиалы, икенчедә — Яр Чаллы дәүләт педагогия университеты.
Шәһәр оешмалары һәм предприятиеләре арасында беренче этап җиңүчесе — «КАМАЗ» ГАҖ хезмәткәре Юрий Лазарев, беренче урынны «КАМАЗ» ГАҖ яулады, икенче урында — «Камские электросети», өченче урында — Яр Чаллы ТЭЦ.
Бу көн тагын бер кат исбатлады: спорт берләштерә, рухландыра һәм истәлекне саклый. Яр Чаллы — көчле, актив һәм битараф булмаган кешеләр шәһәре!