Бүген Яр Чаллыдан Лисичанск шәһәре халкына һәм махсус хәрби операция зонасында булган хәрбиләргә 60 тонна ярдәм озатылды. КАМАЗның дүрт йөк машинасына 1 500 бүләк җыелмасы төялгән.
Йөкне озатуда шәһәр мэры Наил Мәһдиев, «КАМАЗ» ГАҖ генераль директоры Сергей Когогин һәм предприятие хезмәткәрләре катнашты. Бу шефлык һәм гуманитар ярдәм йөкләрен «КАМАЗ» ГАҖ хезмәткәрләре җыйды.
Шәһәр мэры иң беренче чиратта «КАМАЗ» ГАҖ коллективына хезмәтләре өчен рәхмәт белдерде.
«КАМАЗ» җыйган гуманитар ярдәмнең гомуми күләме 125 миллион сумнан арткан. Шулай ук «КАМАЗ» профсоюзлары махсус хәрби операция зонасындагы хәрбиләр өчен Ватанны саклаучылар көне белән котлаулар язылган 2 000нән артык хат һәм котлау открыткасы җыеп озатты.